18 август — Рӯзи кормандони соҳаи тиб дар Ҷумҳурии Тоҷикистон аз ҷумлаи санаҳои муҳимест, ки нақши табибону кормандони соҳаи тандурустиро дар ҳифзи саломатии аҳолӣ ва беҳбуди сифати зиндагии ҷомеа бозгӯ мекунад.
Дар солҳои соҳибистиқлолӣ соҳаи тандурустии кишвар ба яке аз самтҳои афзалиятноки сиёсати иҷтимоии давлат табдил ёфта, барои рушди муассисаҳои тиббӣ, ҷорӣ намудани технологияҳои муосир, баланд бардоштани сатҳи хизматрасонии тиббӣ ва омодасозии мутахассисони соҳибкасб тадбирҳои пайваста амалӣ мегарданд.
Рушди тандурустӣ ҳамзамон барои густариши сайёҳии солимгардонӣ ва тиббӣ имкониятҳои нав фароҳам меорад. Тоҷикистон бо табиати нотакрор, чашмаҳои минералӣ, обҳои шифобахш, иқлими мусоид ва минтақаҳои кӯҳистонии дорои ҳавои тоза барои рушди ин навъи сайёҳӣ иқтидори назаррас дорад.
Мавзеъҳои истироҳатию табобатӣ ва осоишгоҳҳои кишвар метавонанд дар баробари хизматрасонии тиббӣ, шароити муносиб барои истироҳат, барқарорсозии неру ва таҳкими саломатии инсонро фароҳам созанд. Ҳамин омилҳо сайёҳии солимгардониро ба яке аз самтҳои муҳими пайванди соҳаҳои тандурустӣ, сайёҳӣ ва иқтисоди миллӣ табдил медиҳанд.
Таваҷҷуҳ ба рушди инфрасохтори тиббӣ ва сайёҳии солимгардонӣ, баланд бардоштани сифати хизматрасонӣ ва муаррифии имкониятҳои табиию табобатии Тоҷикистон метавонад барои ҷалби сайёҳони дохилию хориҷӣ заминаи мусоид фароҳам оварад.
Дар ин раванд саҳми кормандони соҳаи тиб — аз табибону ҳамшираҳо то мутахассисони соҳаҳои гуногуни тандурустӣ — ниҳоят муҳим мебошад. Зеро ҳифзи саломатии инсон на танҳо вазифаи иҷтимоӣ, балки яке аз омилҳои асосии рушди ҷомеаи солим ва устувор ба ҳисоб меравад.
Ба муносибати Рӯзи кормандони соҳаи тиб ба тамоми кормандони ин соҳаи масъулиятнок саломатии бардавом, неруи тоза, муваффақиятҳои касбӣ ва дар роҳи ҳифзи саломатии ҷомеа дастовардҳои нав орзу менамоем.
