Аз 25 то 28 майи соли 2026 дар Ҷумҳурии Тоҷикистон бо ташаббуси Созмони Милали Муттаҳид ва Ҳукумати Ҷумҳурии Тоҷикистон Конфронси чоруми сатҳи баланд оид ба Даҳсолаи байналмилалии амал «Об барои рушди устувор, 2018–2028» баргузор гардид.
Ин ҳамоиши муҳими байналмилалӣ ҳамчун минбари муҳими сиёсӣ ва илмӣ барои баррасии масъалаҳои вобаста ба захираҳои об, тағйирёбии иқлим, амнияти экологӣ ва рушди устувор хизмат намуд.
Дар кори конфронс намояндагони давлатҳо, созмонҳои байналмилалӣ, ниҳодҳои молиявӣ, ҷомеаи шаҳрвандӣ, олимон ва коршиносони соҳавӣ иштирок намуда, масъалаҳои муҳими марбут ба истифодаи оқилонаи захираҳои об, таҳкими ҳамкориҳои байналмилалӣ ва роҳҳои ҳалли мушкилоти вобаста ба обу иқлимро мавриди муҳокима қарор доданд.
Ҳадафи асосии конфронс таҳкими ҳамкориҳои байналмилалӣ дар самти татбиқи ҳадафҳои Даҳсолаи байналмилалии амал «Об барои рушди устувор, 2018–2028» ва мусоидат ба амалисозии Ҳадафҳои рушди устувори Созмони Милали Муттаҳид, бахусус Ҳадафи 6-ум — таъмини дастрасӣ ба оби тоза ва беҳдошт барои ҳама арзёбӣ гардид.
Конфронси мазкур нақши Ҷумҳурии Тоҷикистонро ҳамчун кишвари пешсаф дар пешбурди рӯзномаи ҷаҳонии об бори дигар таҳким бахшида, саҳми онро дар ташаккули ҳамкориҳои байналмилалӣ дар самти ҳифзи захираҳои об ва муқовимат ба тағйирёбии иқлим боз ҳам барҷастатар намуд. Иштирокчиёни ҳамоиш ташаббусҳои байналмилалии Тоҷикистонро дар самти масъалаҳои об ва иқлим баланд арзёбӣ карданд.
Таъкид гардид, ки натиҷаҳои конфронс метавонанд барои амалисозии ҳадафҳои рушди устувор, ҳифзи муҳити зист ва таъмини амнияти об дар сатҳи минтақавӣ ва байналмилалӣ заминаи мусоид фароҳам оваранд. Ҷумҳурии Тоҷикистон бо идомаи ташаббусҳои созандаи худ дар самти масъалаҳои обу иқлим нақши муассири худро дар ҳалли мушкилоти глобалӣ боз ҳам таҳким мебахшад.
