Ҳаводорону дӯстдорони варзиши тоҷик дар Фурудгоҳи байналмилалии Душанбе бо руҳияи баланди тоҷикона ва эҳсоси гарми ватандӯстӣ ҳайати дастаи мунтахаби Тоҷикистонро, ки аз Бозиҳои олимпии Париж-2024 бо дастоварди олимпӣ ба Ватан баргаштанд, пешвоз гирифтанд, иттилоъ медиҳад АМИТ «Ховар».
Дар Фурудгоҳи байналмилалии Душанбе варзишгарони муваффақро Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, роҳбарияти Кумитаи ҷавонон ва варзиш, Мақомоти иҷроияи ҳокимияти давлатии шаҳри Душанбе, Федератсияи ҷудои Тоҷикистон ва дигар масъулони соҳаи варзиши мамлакат пуршукуҳ истиқбол гирифтанд.
Дар фурдгоҳи байналмилалии Душанбе дар назди ҳазорон нафар мухлисон, ки бо нидоҳои «офарин-офарин» варзишгаронро пешвоз гирифтанд, Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа ва дигар масъулон бори дигар парчамбардоронро бо медалҳои ба дастоварда табрику муборакбод намуданд.
Варзишгарон барои муҳайё кардани шароити мусоид ҷиҳати омодашавӣ ба Бозиҳои 33-юми тобистонаи олимпӣ-2024, ки дар шаҳри Парижи Фаронса баргузор гардид, изҳори минатдорӣ намуда, дар назди ҳозирин ваъда доданд, ки минбаъд барои баланд бардоштани обрӯю нуфузи Тоҷикистон дар арсаи байналмилалӣ тамоми қувваю маҳоратро сарф намоянд.
Лаҳзаи истиқболи варзишгарон дар фурудгоҳ бо иҷрои Суруди миллӣ ба поён расид ва варзишгарон бо меҳмонону иштирокдорони маросими истиқбол ба Маҷмааи меъмории «Ваҳдати миллӣ ва эҳёи Тоҷикистон», воқеъ дар майдони «Дӯстӣ»-и шаҳри Душанбе роҳсипор шуданд.
Бояд тазаккур дод, ки Бозиҳои 33-юми тобистонаи олимпӣ-2024 аз 26 июл то 11 август дар шаҳри Парижи Фаронса баргузор гардиданд. Дастаи олимпии Ҷумҳурии Тоҷикистон дар Бозиҳои олимпии Париж-2024 се медали биринҷӣ гирифт. Ду медалро дар риштаи ҷудо Сомон Маҳмадбеков дар вазни то 81 кг ва Темур Раҳимов дар вазни + 100 кг ба даст оварда, медали сеюмро муштзани тоҷик Давлат Болтаев дар вазни то 92 кг соҳиб гардид.
Ёдовар мешавем, ки имрӯз, соати 19:30, дар «Амфитеатр»-и шаҳри Душанбе ба истиқболи ҷоизадорони Бозиҳои олимпӣ чорабинии тантанавӣ баргузор мешавад.
АКС: АМИТ «Ховар»
