Бо дастури Президенти Тоҷикистон ба оилаҳои аз офати табиӣ зарардидаи Вилояти Мухтори Кӯҳистони Бадахшон кумак фиристода шуд

Дар асоси дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба оилаҳои аз офати табиӣ зарардидаи шаҳру ноҳияҳои Вилояти Мухтори Кӯҳистони Бадахшон кумак иборат аз либоси зимистона, пойафзол, маводи ғизоӣ, печи аловӣ, кат бо ҷиҳози хоб ва дигар лавозимоти зарурӣ фиристода шуд, хабар медиҳад АМИТ «Ховар».

Кумак ба оилаҳое, ки давоми чанд рӯзи моҳи феврали соли равон дар натиҷаи офати табиӣ зарар диданд, дастрас карда мешавад.

Кумаки мазкур дар маҷмӯъ аз 18 тонна маҳсулоти ғизоӣ иборат мебошад.

Ҳамчунин 250 кат бо ҷиҳози хоб, маҷмӯи сару либос, 50 печи аловӣ ва як миқдор таҷҳизоти электрикии гармидиҳӣ ба оилаҳои аз офати табиӣ зарардида фиристода шуд.

Мардуми зарардидаи шаҳру ноҳияҳои Вилояти Мухтори Кӯҳистони Бадахшон аз таваҷҷуҳу ғамхориҳои доимии  давлату Ҳукумати Ҷумҳурии Тоҷикистон, хусусан Президенти Ҷумҳурии Тоҷикистон муҳтарам Эмомалӣ Раҳмон рӯҳбаланд гардида, изҳори сипосу минатдорӣ менамоянд.

Ёдовар мешавем, ки дастгирии оилаҳои аз офати табиӣ зарардида ва бартарафкунии оқибатҳои офати табиӣ зери таваҷҷуҳи пайвастаи Ҳукумати Ҷумҳурии Тоҷикистон қарор дорад.

АКС аз рӯи навор